2025-ci ilin aprel ayında Active Group şirkəti və Experts Club analitik mərkəzi tərəfindən keçirilmiş ümummilli sorğunun nəticələrinə əsasən, ukraynalıların əksəriyyəti Azərbaycana müsbət və ya neytral münasibət bəsləyir.
Respondentlərin 42,4%-i ölkəyə müsbət münasibət bildirib: 33,6%-i əsasən müsbət, 8,8%-i isə tam müsbət münasibət göstərib. Neytral mövqe 45,4% tərəfindən seçilib. Cəmi 7,7% mənfi münasibət bildirib, 4,5% isə cavab verməkdə çətinlik çəkib. – https://surl.li/xwyard, https://surl.li/xcafsu
Müsbət münasibətə Azərbaycandan göstərilən humanitar yardım və biznes fəallığı da təsir edir: son iki ildə azərbaycanlılar Ukraynada 180-dən çox şirkət qeydiyyatdan keçirib. Azərbaycanlı sahibkarlar bu sahədə ən fəal əcnəbi iştirakçılardan biridir.
Bu barədə AZƏRTAC-a danışan Ukrayna-Azərbaycan Biznes Assosiasiyasının “TƏRƏZİ” prezidenti Cəlal Hüseynov qeyd edib:
“Ölkədə bank sektoru qorunub, enerji sistemi bərpa olunub, Azərbaycanın göstərdiyi enerji və humanitar dəstək isə bu prosesin ayrılmaz hissəsidir. Həmçinin Azərbaycan və Ukrayna hökumətləri arasında İkitərəfli Biznes Şurası artıq fəaliyyətini genişləndirib. Bu il dövlət-özəl tərəfdaşlıq sahəsində əsaslı dəyişikliklər gözlənilir. İnvestisiya layihələri üçün prosedurlar sadələşdirilib. Həmçinin ABŞ-la strateji minerallar üzrə memorandum imzalanıb. Bu da uzunmüddətli investisiyalar üçün vacib siqnaldır”, – deyə assosiasiya rəhbəri qeyd edib..
Cəlal Hüseynov əlavə edib ki, hərbi vəziyyətə baxmayaraq, iki ölkə arasında ixrac və idxal əməliyyatlarının səviyyəsi qorunub saxlanılır.
